BUTUAN CITY – All-set na ang Alviola Village Integrated Secondary School-Main Campus sa himuong Brigada Eskwela sugod karong Lunes, Hulyo 22 ngadto sa 26.
Sa eksklusibong pakighinabi sa Bombo Radyo Butuan, gibutyag ni Daisy Bacleon, ang Senior High School coordinator sa maong tunghaan, importanteng apilan sa mga ginikanan ang tinuig nga kalihukan sa Department of Education tungod kay maghatag kini og kalipay sa ilang mga anak ilabina nga wala lamang sila nagkinahanglan sa suportang pinansyal kondili apil na ang morale.
Kinahanglan matud pa nga makita sa kabataan diha sa ilang mga ginikanan ang satong sumbanan aron mahimong usa ka maayong tawo hangtud sa iyang pagdako.
Gidasig niini ang mga ginikanan nga magdala og mga gamit sa panghinlo samtang kadtong dili makatambong, pwede lang usab muhatag og in-kind nga makatabang gihapon sa pagpanindot sa mga classrooms aron dili na manghinlo pa ang mga bata sa pagsulod nila sa unang adlaw sa klase.
Wala matud pa’y angayang kabalak-an ang mga ginikanan nga mu-donate og kwarta o bisan unsang butang nga makatabang pag-beautify sa ilang tunghaan tungod kay i-record kini sa presidente ug treasurer sa ilang Parents-Teachers’ Association kon PTA.
