BUTUAN CITY – Salmotan sa Pinay tennis star nga si Alex Eala ang daghang sunod-sunod nga torneo sa umaabot nga mga semana.
Una niyang pag-apil sa clay court mao ang Linz Open, usa ka WTA 500 event sa Austria nga magsugod gikan Abril 6 hangtod 12.
Lakip sa iyang posibleng makalaban mao ang mga dagkong ngalan sa tennis sama nila Emma Raducanu, Clara Tauson, Jelena Ostapenko ug ang defending champion nga si Ekaterina Alexandrova.
Moapil usab siya sa WTA 500 tournament sa Germany nga ipahigayon gikan Abril 13 hangtod 19.
Makigkompetensya usab ang world ranked 45 nga si Eala sa Madrid Open nga mahitabo gikan Abril 21 hangtod Mayo 3.
Sa miaging tuig sa Madrid tournament, napildi siya ni Iga Swiatek sa tulo ka sets sa ikaduhang round.
Nasayran nga bag-o lang nahuman ni Eala ang iyang pag-apil sa mga torneo sa US sama sa Indian Wells ug Miami Open.
