BUTUAN CITY – Pasok na sa knockout round sa The Voice of Poland Season 9 ang Agusanon nga si Jay Allen human niya napildi sa battle rounds ang ka-ubang contestang nga si Alisja Smielak kinsa parehong ilalom kang coach Patrycja Markowska.
Gikanta sa duha sa episode 12 sa maong reality singing competition ang kantang ‘Come and Get It’ kondiin gipakita sa 34-anyos nga singer kinsa lumad nga taga-Buenavista, Agusan del Norte ang tanan niyang mahatag nga ‘the best’ sa iyang performance.
Sa pagkakaron, nangandam na ang local singer alang sa knockout rounds nga himuon karong Nobyembre 3.
Sa eksklusibong interview sa Bombo Radyo Butuan, nagpasalamat siya sa tanang misuporta kaniya ilabina sa mga Pinoy sa bisan asang suok sa kalibutan nga nag-like og nag-share sa iyang Facebook og Instagram posts ilabina ang iyang mga kababayan sa lungsod sa Buenavista.
Mi-apela usab siya sa tanan nga suportahan pa ang padayon niyang ‘The Voice Poland’ journey aron masakmit ang dugay na niyang gipangandoy nga mahimong professional singer. (Beth Ruiz)
