BUTUAN CITY – Dunay natala na nga landslide sa lalawigan sa Agusan Del Norte tungod pa gihapon kang Bagyong Auring.
Sigon ni Erma Suyo, Head sa Provincial Disaster Risk Reduction Management Council kon PDRRMC sa probinsiya, wala pa gihapong dapat ikabalaka sa maong landslide tungod kay layo kini sa kumunidad.
Gisiguro usab sa opisyal nga activated na ang tanang provincial action centers aron maka-responde gelayon sa mga posibling kadaot sa maong bagyo.
Andam na usab ang duha ka speed boat sa municipyo sa Las Nieves tungod sa pag-awas sa tubig baha nga maoy hinungdan usab sa rekomendasyong preemptive evacuation ilabina na sa mga low-lying areas.
Samtang naka-andam ang mga relief goods nga ipanghatag sa mga apektadong pamilya.
Gikumpirma usab ni Sanguniang Panlalawigan kon SP member Loreto Maragañas nga gibana-banang 60 porsiento sa basakan sa lungsod sa RTR sa Agusan Del Norte, ang nadamyos.
Samtang sa Butuan City, dunay 14 ka pamilya o gilangkuban sa 81 ka indibidwal gikan sa Barangay Buhangin, ang anaa sa evacuation center sa Agusan National High School tungod sa pag-awas sa Agusan River.
