BUTUAN CITY – Wala’y lipod-lipod nga gipadayag ni Vice President Sara Duterte nga duna’y nagkupot o nagkontrola karon sa dagan sa imbestigasyon kalabot sa garapalan nga kurapsyon diha sa mga flood control projects ug uban pang mga proyekto sa gobyerno.
Sa iyang pag-atubang sa mga tigbalita, gipadayag ni VP Sara nga maklaro kini sa dagan karon sa imbestigasyon nga kalit lang mawala kung mupadulong ug matumbok na nga nalambigit sa anomaliya ang buhatan ni Pangulong Ferdinand ‘Bongbong’ Marcos Jr uban sa iyang mga alipores.
Gibirahan pa ni VP Sara ang Office of the Ombudsman nga kung tinud-anay ang ilang tinguhang limpyuhan ang kurapsyon sa gobyerno, anaa ang isyu sa laptop sa Department of Education nga pwede nilang unahon kansa nahitabo niadtong siya pa ang kalihim sa maong ahensya kondiin nalambigit matud pa niini si kanhi Congressman Zaldy Co, pinaagi sa iyang gipanag-iyahang Sunwest Construction and Development Corporation.
Sigon pa sa bise presidente, dugay na niyang gibutyag nga wala’y gihimo ang kasamtangang administrasyon kondili mao lang ang paghurot sa pundo sa gobyerno ug ang pamulitika.
Dili matud pa buta ang katawhan aron dili makita kung unsa ang nahimo sa administrasyong Marcos alang sa katawhan.
Kwestyunable usab ang pagpili sa administrasyon sa mga gi-imbestigahan kondiin ang duol sa ilang luwag, mawala lang og kalit sa imbestigahan.
