BUTUAN CITY – Magpahulay ug mag-focus una sa pagpa-ayo sa iyang samad sa tuhod si Pinay tennis ace ug World No. 15 Alex Eala sa iyang pagpa-uli sa Pilipinas human sa iyang sunod-sunod nga kampanya sa mga internasyonal nga torneyo.
Gikan sa ika-50 nga ranggo sa pagsugod sa 2026, misaka og 35 ka puwesto si Eala aron makab-ot ang labing taas niyang ranggo sa Women’s Tennis Association o WTA rankings.
Lakip sa nakatampo sa iyang pagsaka sa ranggo mao ang iyang mga kadaugan sa WTA Tour 250 tournaments sa Washington DC ug Birmingham. Apan sa iyang kataposang duwa sa Hong Kong Open, na-angol ang iyang tuhod atol sa championship match batok sa Amerikanang si Claire Liu, kondiin napildi siya sa iskor nga 3-6, 0-6.
Samtang ania sa Pilipinas, gikatakdang mu-apil si Eala sa exhibition match nga Alex Eala Live: Game. Set. Celebrate sa Disyembre 8 nga himuon sa Philippine Arena sa Bocaue, Bulacan.
Makigdula usab kaniya ang 2024 Paris Olympics double-gold medalist nga si Carlos Yulo ug boxing icon Manny Pacquiao. Atubangon ni Eala ang Indonesian tennis player ug World No. 60 nga si Janice Tjen.
Human sa mubo nga pagpahulay sa nasud, mobalik si Eala sa internasyonal nga kompetisyon pinaagi sa iyang pag-apil sa 2027 ASB Classic sa Auckland, New Zealand, nga himuon sa Enero 4 hangtod 10.
Sa mi-aging edisyon sa torneyo, nakaabot siya sa semifinals sa singles ug doubles kauban ang iyang suod nga higala nga si Iva Jovic sa Estados Unidos.
Nakahimo usab si Eala og maayong kampanya sa 2026 Grand Slam tournaments diin nakaabot siya sa third round sa US Open ug fourth round sa Wimbledon, diin nakapildi siya sa reigning champion nga si Iga Swiatek sa Poland.












