BUTUAN CITY – Plano sa Senado nga kunhuran og mga ₱2 bilyon ang ilang gisugyot nga budget alang sa tuig 2027, isip pagpakita sa fiscal discipline ug ehemplo sa mas ma-ampingong paggamit sa pundo sa gobyerno.
Sigon ni Senate Committee on Accounts Chairperson Senador Panfilo “Ping” Lacson, ang maong lakang nasabutan nila Senate President Sherwin Gatchalian. Gikan sa P7.7 bilyon nga proposed budget sa Senado nga anaa sa National Expenditure Program o NEP, target kining kunhuran og mga P2 bilyon, o mahimo nang P5.7 bilyon.
Sumala ni Lacson, dili ma-apektuhan pag-ayo ang operasyon sa Senado tungod kay aduna pa sila’y mga pondong wala magamit gikan sa mi-aging tuig nga mahimong magamit kung gikinahanglan.
Gipasabot ni Lacson nga gusto nilang mahimong ehemplo sa House of Representatives, ilabina human namatikdan nga misaka og P5 bilyon ang ilang proposed allocation. Gihangyo niya ang Kamara nga ikonsidera usab ang pagkunhod sa ilang mga alokasyon ug makuting susihon ang matag-item sa proposed budget.
Una nang giklaro ni Lacson nga dili angay bawion ang bersyon sa budget nga gipasa na sa Kamara tungod kay posible kining mosangpot sa reenacted budget, o paggamit pag-usab sa mi-aging budget samtang wala pa ma-aprubahan ang bag-ong General Appropriations Act.
Samtang gibutyag usab ni Gatchalian nga ilang susihon pag-ayo ang bersyon sa 2027 budget nga gipasa sa Kamara ug tangtangon ang mga dili kinahanglan nga alokasyon.
Lakip sa ilang susihon ang pipila ka farm-to-market road projects nga gika-ingong adunay sayop o kwestiyonableng coordinates, lakip ang usa ka proyekto nga ang coordinates nagtudlo sa katubigan duol sa Brunei.
