BUTUAN CITY – Gikondena sa grupong Bantay Bigas ang padayong taas nga pag-angkat og bugas sa Pilipinas, human matala ang pagtaas sa gidaghanon sa imported rice gikan Enero hangtod Septembre karong tuiga kumpara sa susamang panahon sa mi-aging tuig.
Sigon ni Cathy Estavillo, spokesperson sa Bantay Bigas, mas angay nga unahon sa gobyerno ang pagpalit sa humay gikan sa lokal nga mga mag-uuma imbes nga magsalig sa imported nga bugas aron makatabang sa panginabuhian sa mga mag-uuma, ilabina taliwala sa kakulang sa suporta sa produksiyon ug bayad nga angay nilang madawat.
Nanawagan usab ang grupo nga palig-onon ang lokal nga produksiyon sa bugas ug hatagan og igo nga suporta ang mga mag-uuma aron mamenosan ang pagsalig sa nasud sa mga imported products.
