BUTUAN CITY – Gipanghimakak ni kanhi Bangsamoro Parliament member Sultan Edrieza Hadji Nasser Rimbang ang alegasyon sa mga otoridad nga siya ang financier sa 521-kilos nga gituohang shabu nga nasakmit sa Laos ug gituohang ipadala unta sa Pilipinas.
Kini base sa nagpadayon nga case build-up sa Criminal Investigation and Detection Group kon CIDG sa maong drug shipment, diin gitumbok siya sa mga isip usa sa mga persons of interest.
Sa video message nga iyang gipagawas, gi-question ni Rimbang nganong gipagawas sa mga otoridad ang iyang pangalan ug litrato bisan og wala’y lig-ong basehan.
Gipanghimakak usab niya ang mga report nga mibiya siya sa nasud tungod sa kontrobersiya dayong butyag nga wala’y rason aron mubiya siya sa nasud tungod kay wala siya’y kasong gi-tubang ug padayon mibarog nga inosente siya.
Matud ni Rimbang, mokonsulta siya sa iyang mga abogado alang sa angay nga legal nga lakang batok sa mga alegasyon.
Mi-apela usab siya sa mga otoridad nga dili ikutay ang iyang pangalan sa maong drug shipment tungod lang kay suod siya sa pamilya Duterte.
Iyang gibutyag nga dili angayang hatagan og malisya ang iyang pagkasuod sa mga Duterte nga nagsugod dihang gitudlo siyang opisyal sa Bangsamoro Parliament panahon ni kanhi Pangulong Rodrigo Duterte.
