BUTUAN CITY- Lauman nga mosaka sa P2 hangtod P2.20 kada litro ang presyo sa gasolina sa Pilipinas sunod simana, samtang posibleng moubos sa P1.80 hangtod P2 kada litro ang diesel tungod sa kausaban sa suplay sa lana sa internasyonal nga merkado.
Sumala sa Department of Energy kon DOE, ang gipaabot nga pagkunhod sa presyo sa diesel nalambigit sa desisyon sa mga nasod sa G7 nga magpagawas og 100 milyon ka baril sa krudo ug diesel gikan sa ilang mga reserbang pang-emerhensiya, samtang ang temporaryong pagsuspinde sa China sa pag-eksport sa processed product sa lana nakapadugang sa presyur sa presyo sa gasolina.
Tungod niini, gipaningkamotan sa gobyerno nga pakunhoran ang pagsalig sa nasod sa lana pinaagi sa mas lapad nga paggamit sa de-koryenteng mga sakyanan ug renewable energy.
