BUTUAN CITY- Gikomperma ni Hannah Galvez, Bombo International Correspondent to Japan, nga nahuman na ang kampanya sa mga atletang Pilipino sa Asian Games 2026 sa Nagoya, Japan, diin nagtapos ang Pilipinas sa ika-16 nga pwesto gikan sa 45 ka nasod, samtang ika-upat sa Southeast Asia.
Nakakolekta ang Team Philippines og kinatibuk-ang 29 ka medalya nga gilangkuban sa upat ka bulawan, 9 ka silver ug 16 ka bronze. Sigon ni Galvez, mao na kini ang kataposan ug opisyal nga medal tally sa Pilipinas human, nahuman na ang tanang kompetisyon sa Asian Games, base sa pinakabag-ong datos nga iyang nadawat alas-5 sa hapon, oras sa Pilipinas.
Gipahayag usab ni Galvez ang iyang kasubo sa resulta ni Alex Eala, nga wala makab-ot ang tumong nga bulawan nga medalya apan nakakuha gihapon og bronze.
Kini na ang ikatulong apil ni Eala sa Asian Games ug ikaduhang higayon nga nakadaog og bronze medal.
Bisan pa niini, aduna pa kini mga oportunidad aron makaabot sa 2028 Olympics, lakip ang posibilidad pinaagi sa iyang WTA ranking ug rekomendasyon sa Philippine Olympic Committee, samtang ang ubang kwalipikasyon nagdepende sa mga lagda ug quota sa maong kompetisyon.
