BUTUAN CITY- Mubandera sa Pilipinas sila Pinay tennis star Alex Eala ug Olympic champion Carlos Yulo sa mga atletang mo-apil sa 20th Asian Games sa Aichi-Nagoya, Japan.
Niadtong Lunes, Setyembre 7, pormal nang gisumite sa Philippine Olympic Committee o POC ang kompletong listahan sa mga atletang moapil sa maong torneyo, diin gilauman nga mahimong kusganong kandidato sa gold medal sila Eala ug Yulo sa ilang tagsa-tagsa ka sporting event.
Sumala pa, mipili si Eala nga dili na lang moduwa sa China Open WTA 1000 aron ipukos ang iyang panahon sa pagrepresentar sa nasud sa Asian Games.
Sa milabay nga tulo ka tuig, nakadaog na si Eala og duha ka bronze medal sa maong kompetisyon diin usa sa singles ug usa sa mixed doubles.
Si Yulo, nga usa ka Olympic artistic gymnastics champion, mosulay usab nga makuha ang iyang unang gold medal sa Asian Games human sa iyang kadaugan sa Asian Championship niadtong Hunyo sa Zunyi, China.
Lakip usab sa mga atletang mosabak si Annie Ramirez sa jiu-jitsu, EJ Obiena sa pole vault, Daniel Caluag sa BMX, ug ang Gilas Pilipinas men’s basketball team, ingon man ang Alas Pilipinas women’s ug men’s volleyball teams ug ang mga golfer nga sila Bianc Pagdanganan ug Pauline Del Rosario.
