BUTUAN CITY – Nagtuo si House private prosecutor Atty Lorna Kapunan nga kinahanglang tutukan sa publiko ang impeachment trial batuk kang Vice President Sara Duterte ug dili magpadala sa mga isyung gibato matud pa sa Office of the Vice President kon OVP batuk sa pipila ka mga opisyal ug ahensya sa gobyerno.
Sigon ni Kapunan, klaro matud pa nga diversionary tactics ang pagmugna og laing resibo sa OVP apil ang isyu sa professionalism ingon man transparensiya sa ubang mga buhatan.
Dugang pa niini nga dili criminal liability ang tumong sa impeachment proceedings kondili ang pagtubag sa mga alegasyong paglapas sa Konstitusyon sama sa graft and corruption, betrayal of public trust, ug uban pang high crimes.
Nanawagan usab siya sa media nga ibalik ang isyu sa impeachment case inay nga itu-is ngadto sa laing isyung gilambigitan sa ubang mga government agencies.
Nagpahimangno usab si Kapunan sa pagkaylap karon sa culture of violence sa nasud human ang pagpamusil sulod sa mga tunghaan sama sa nahitabo sa Ateneo de Zamboanga University kondiin nakadugang pa niini nga kultura si VP Sara tungod matud pa sa mga pamahayag niining duna’y kalabutan sa kagubot ug pagbahad sa kinabuhi. Giklaro niini nga wala niya gibutyag nga si VP Sara ang direktang responsable sa kagubot sa kabatan-unan apan isip usa ka taas nga opisyal sa gobyerno, angayan niining ipakita nga usa siya ka maayong ehemplo.
