BUTUAN CITY – Napuno sa pagpasalamat ug tumang kalipay ang gibati sa Filipina doctor nga nagpuyo na sa California human siya gikoronahan isip Miss Philippines USA Empress 2026.
Sa eksklusibong pakighinabi sa Bombo Radyo Philippines, gipadayag ni Dr Fema Marie Ardiente nga dili na bag-o alang kaniya ang beauty pageant tungod kay nagsugod siya pag-apil sa mga ingon niini dinhi sa Pilipinas sa edad nga 5-anyos pa lang.
Dihang mi-graduate sa college ug mipasar sa nursing board exam, mas gipili niyang tutukan ang iyang karera ug magpadayon sa Estados Unidos.
Gipadayag niining jalos 15 ka tuig na ang milabay dihang misalmot siya sa usa ka beauty pageant sa Pilipinas rason nga espesyal alang kaniya nga makabalik sa entablado ug makadaug sa maong indigay sa ka-anyag nga nahitabo pa sa California.
Dugang pa ni Dr Ardiente, dili sayon ang iyang gihimo tungod kay temporaryo pa niyang gibiyaan ang iyang klinika aron pangandaman ang maong kompetisyon ilabina sa question and answer portion, tungod kay dili lang ang iyang kaugalingon ang iyang girepresentahan kondili apil na ang iyang komunidad sa California ug ang Pilipinas.
