BUTUAN CITY – Gipahibalo ni US President Donald Trump nga iyang gikansela ang planong pag-atake sa Iran, basta dali nga makab-ot ang usa ka kasabutan tali sa duha ka panig.
Sa iyang post sa Truth Social, gibutyag ni Trump nga iyang gipahunong ang planong opensiba, apan nagdepende gihapon kini sa gipaspason sa pagpirma sa kasabutan kondiin lakip sa iyang mga kondisyon ang pag-abli gilayon sa Strait of Hormuz ug ang pagwagtang sa nuclear program sa Iran.
Sigon ni Trump, ang maong desisyon gihimo uban sa koordinasyon sa Israel kansa mitumaw taliwala sa mga taho sa US media nga posible unta ang bag-o ug mas kusog nga airstrikes batok sa Iran niining katapusan sa semana.
Una nang gi-akusahan sa Tehran ang Estados Unidos nga nagpadako sa tensyon sa rehiyon ug nagpasidaan nga ang bisan unsang nasod nga makigtambayayong sa Washington madamay sa gubat.
Sa iyang mensahe, gibutyag usab ni Trump nga ang militar sa Estados Unidos andam na unta sa pag-atake batok sa Iran, nga iyang gihulagway nga adunay kusog ug gahum nga wala pa makita sukad pa sa ikaduhang gubat sa kalibutan apan iyang gikansela human matud pa mihangyo ang Iran ug sa ubang mga nasod sa Middle East nga ipahunong una ang opensiba aron hatagan og higayon ang negosasyon.
