BUTUAN CITY- Nakakuha og dakong pagtagad ug positibong reaksyon gikan sa mga audience ang walo ka humanoid robots sa Chinese technology firm nga Unitree human silang mipasundayag uban sa Chinese dancer nga si Wu Yufei, o mas nailhan nga “Flying Bug,” sa season premiere sa America’s Got Talent.
Ang maong pasundayag, nga naghiusa sa sayaw, robotics ug modernong teknolohiya, nakadawat og standing ovation gikan sa audience ug unanimous nga pag-apruba gikan sa mga hurado tungod sa hapsay ug dungan nga lihok sa mga robot.
Sumala sa mga eksperto, ang maong pagpakita makatabang sa pagpalapad sa pagdawat sa publiko sa Chinese-made robots sa Estados Unidos, bisan pa nga adunay mga sugyot balaodnon sa Kongreso nga nagtinguha sa pagdili o paglimita sa paggamit tungod sa mga kabalaka sa nasudnong seguridad.
Samtang nagpadayon ang pag-uswag sa industriya sa robotics sa China, giila usab sa mga tigpaniid nga aduna pay mga hagit sa internasyonal nga merkado lakip na ang pagpalig-on sa lokal nga suporta, maintenance ug serbisyo aron mas mapalapdan ang paggamit sa humanoid robots sa ubang mga nasod.
