BUTUAN CITY – Nagpagawas og bag-ong patakaran ang Registry sa International Criminal Court (ICC) alang sa nakatakdang pagtaral kang kanhe Pangulong Rodrigo Duterte, nga nag-atubang sa kasong crimes against humanity mahitungod sa iyang kampanya kontra ilegal nga droga.
Lakip sa mga rekomendasyon sa ICC Registry ang pagmando sa mga partido ug apil sa kaso nga klarong tumbukon ang mga parte sa transcript nga gusto nilang ipa-redact o itago sa publiko.
Gisugyot usab sa Registry ang paggamit sa transcript verification process nga gigamit sa kaso ni Mahamat Said Abdel Kani aron maseguro ang accuracy sa mga official record sa pagtaral.
Gawas niini, giaghat sa Registry ang Trial Chamber III ug ang mga apil sa kaso nga gamiton ang witness-entity ug evidentiary-materials o E-binders modules sa Judicial Workflow Platform.
Sumala sa Registry, makatabang kini aron mapabiling organisado ug anaa sa usa ka komprehensibong sistema ang tanang record sa kaso.
Mahinumdumang sa unang status conference niadtong Mayo 27, gibutyag ni Trial Chamber III Presiding Judge Joanna Korner nga mohimo ang korte og bag-ong pagsusi sa panglawas sa kanhe pangulo aron matumbok kung siya dunay kapasidad nga moatubang sa pagtaral.
Nakatakdang magsugod ang pagtaral ni Duterte sa Nobyembre 30, 2026.
Makabaton usab og duha pa ka status conferences ang ICC sa Hunyo 23 ug Hulyo 14 isip kabahin sa pagpangandam alang sa nagkadool nga pagtaral.
