BUTUAN CITY – Malipayong gipa-ambit karun sa aktres nga si Cristine Reyes nga engaged na siya sa iyang partner nga si Gio Tingson.
Sa iyang social media post, gipa-ambit ni Cristine ang pipila ka hulagway nila ni Gio, lakip ang usa ka kuha diin gipakita niya ang iyang engagement ring.
Gelayon usab nga mibaha ang pagtimbaya gikan sa ilang mga higala, kaparehong artista ug fans sa comment section sa nasangpit nga post.
Mahinumdumang unang miulbo ang balitang nag-date sila Cristine ug Gio niadtong 2025.
Si Gio ang nagsilbing chairperson sa National Youth Commission gikan sa 2014 hangtud sa 2016.
Nahimong Chief Political Officer usab siya ni Senador Bam Aquino sukad sa 2016 hangtud 2018 ug nahimong chairperson sa Akbayan Citizen’s Action Party gikan sa 2018 hangtud sa 2022.
Sa laing bahin, kanhe gikasal si Cristine sa professional MMA fighter nga si Ali Khatibi niadtong 2016. Duna silay usa ka anak nga si Amarah nga gihimugso niadtong 2015.
Niadtong Pebrero 2024, gikumpirma ni Cristine nga kapin usa ka tuig nga matud pa siyang annulled kang Ali.
Na-link usab kaniadto si Cristine Reyes ug Marco Gumabao human i-anunsyo ang ilang relasyon ug natapos niadtong Abril 2025.
