BUTUAN CITY – Usa ka student leader sa University of the Philippines Diliman University Student Council ang lakip sa 19 nga namatay sa insidente sa Toboso, Negros Occidental, sumala sa pamahayag sa nasangpit nga konseho niadtong Miyerkules.
Naila ang biktima nga si Alyssa Alano, Education and Research Councilor sa UP Diliman USC, nga gika-ingong namatay sa nahitabong insidente niadtong Abril 19 sa Barangay Salamanca.
Sumala sa University Student Council, nahitabo ang insidente human matud pa ang “walay hunong nga pagpamusil sa 79th Infantry Battalion sa Armed Forces of the Philippines (AFP), nga nagresulta usab sa paghikling sa kapin 168 ka pamilya ug 653 indibidwal.
Sa ilang pamahayag, gitumbok sa student council nga si Alyssa usa ka “innocent civilian” ug gikondena ang pagkamatay niini nga gikutay nila sa matud pa militarisasyon sa lugar.
Samtang una nang gibutyag sa Philippine Army nga dunay nahitabong engkwentro tali sa 79th Infantry Battalion ug mga gidudahang miyembro sa New People’s Army sa parehong lugar.
Sumala sa taho sa militar, 19 ka NPA members ang napatay ug usa ka sundalo ang nasamdan apan anaa sa maayong kondisyon na kini.
Gipahayag sa UP Office of the Student Regent ang pahasubo sa pagkamatay ni Alano, nga ilang gihulagway isip magtutungha ug lider-estudyante sa UP Diliman.
Sa karun, ‘wala pay pamahayag ang AFP aron klaruhon ang managlahing taho mahitungod sa insidente.
