BUTUAN CITY – Nagkanat karon ang mga videos sa social media nga nagpakita nga ang ubang kompanya sa India nagpasuot og head cameras sa ilang mga trabahante samtang nagtrabaho aron i-record ilang lihok para gamiton sa pag-train sa mga artificial intelligence kon AI robots.
Tungod sa paspas nga pag-uswag sa AI, daghan na karon ang nahadlok nga bisan unsang trabaho pwede mapulihan sa mga robots. Sa una, ang mga manual workers medyo kampante pa, apan karon murag apil na pud ang ilang trabaho sa peligro.
Sa usa ka garment factory, nakita sa viral videos nga ang mga manahiay nga naggamit og sewing machines samtang naka-head camera. Bisan wala pa’y klarong kumpirmasyon, ang theory mao, nga gamiton ang videos aron tudluan ang robots unsaon paghimo sa ilang trabaho.
Sumala sa India Today, ang mga camera nagkuha gayud sa insaktong makita sa trabahante—apil na ang lihok sa kamot ug unsaon nila pagbuhat sa trabaho. Tungod ani, makabuhat og daghang data nga magamit sa machines para makakat-on.
Imbis nga mogamit og mahal nga motion-capture tools, pwede ra kuno gamiton sa kompanya ang “human-eye view” aron tudluan ang robots pinaagi sa pagtan-aw ug pagsundog sa tawo.
