BUTUAN CITY – Luwas nang nakapauli sa nasud niadtong Sabado, Abril 18 ang 10 gikan sa 21 ka Pilipinong tripulante nga sakay sa oil tanker nga MT Aqua 1, nga naigo sa Iranian missile sa Persian Gulf duol sa Qatar niadtong unang semana sa Abril.
Gikompirma kini ni Department of Migrant Workers (DMW) Secretary Hans Leo Cacdac.
Sumala sa kalihim, karon gitabangan na sa Overseas Workers Welfare Administration (OWWA) ang maong mga Filipino seafarers.
Gipahibalo usab sa kalihim nga luwas ang nahibiling mga Pilipinong tripulante nga sakay sa oil tanker ug gilauman nga moabot na sa nasud.
Hinumdoman nga ang barko nga MT Aqua 1 anaa sa gilay-on nga 17 nautical miles sa amihanang bahin sa Ras Laffan Industrial Hub sa Qatar sa dihang naigo kini sa cruise missile gikan sa Iran niadtong Abril 1, 2026, hinungdan nga nasunog apan gelayon nga napalong sa mga tripulante.
Maayo gani kay walay bisan usa nga nasamdan sa tanang 21 ka Pilipinong tripulante nga sakay sa maong oil tanker.
