BUTUAN CITY- Gipadayag ni Manila Rep. Joel Chua nga posibleng nakahimo og election offense si Vice President Sara Duterte kung mapamatud-ang mingdawat ang iyang kampanya niadtong 2022 og pondo gikan sa Chinese nationals nga adunay kalabotan sa Pharmally.
Sumala sa Omnibus Election Code, bawal sa mga langyaw ang mag-ambag sa kampanya, ug ilegal usab alang sa mga kandidato nga modawat sa susamang donasyon.
Dugang pa ni Chua, posible kining moresulta sa culpable violation of the Constitution ug klaro sa pagsupak sa election laws kung mapamatud-ang foreign nationals ang mga nalambigit.
Base sa affidavit ni Ramil Madriaga, nga nagpailang kanhing aide ug bagman ni Duterte, mingdawat kini og milyones pisos gikan nila Lin Weixiong ug mga negosyanteng sila Tony Yang ug Michael Yang alang sa campaign activities.
Gigamit matud pa ang pondo sa operations nga ISIP, usa ka non-profit nga gi-ingong gitukod aron suportahan ang kandidatura ni VP Sara.
Gitumbok usab ni Chua nga lahing hisgutanan usab kung gideklara ba ang maong mga donasyong sa Statement of Contributions and Expenditures (SOCE) sa Bise Presidente.
Samtang, nagpabiling bukas ang House Committee on Justice sa kampo ni Duterte aron tubagon ang mga alegasyon, samtang padayon usab kining wala mingtunga sa mga hearing ug mipasaka og petisyon sa Korte Suprema aron ipahunong ang proseso.
