BUTUAN CITY- Pormal na nga molihok ang imbestigasyon sa House Committee on Justice kalabot sa gi-atubang nga impeachment complaint ni Vice President Sara Duterte human wala magpagawas og temporary restraining order (TRO) ang Korte Suprema aron pugngan ang proseso. Gikomperma ni House Committee on Public Accounts Chair ug Bicol Saro Party-list Representative Terry Ridon nga plantsado na ang tanang pagpangandam alang sa pagpadayon sa hearing.
Dungan niini, gipadayag sa magbabalaod nga nakalinya na ang mga testigo nga mo-atubang sa korte, lakip ang usa ka Ramil Madriaga kansa gitudlo isip bagman sa Bise Presidente. Bisan paman nga ming-uswag na ang proseso, giklaro ni Ridon nga ang kasamtangang yugto gi-ila palang nga usa ka preliminary investigation ug dili pa usa ka pormal nga pagtaral o trial.
Sumala sa kongresista, gituman lang sa Kamara de Representantes ang eksklusibong mandato niini ubos sa Konstitusyon. Parte sa maong katungdanan ang hingpit nga pagtuon sa mga reklamo nga gisang-at aron mahibal-an kung adunay igo nga basehan o lagmit nga hinungdan aron mapadayon ang kaso sa impeachment sa Senado. Gawas sa daw bagman, gilaoman usab nga moatubang sa mga magbabalaod ang uban pang mga opisyal gikan sa mga sa gobyerno, mga abogado, ug uban pang resource persons nga adunay direktang relasyon sa mga alegasyon. Ang mga niini gimandoang magsumite sa ilang mga sworn affidavits ug uban pang dokumentong magsilbi isip ebidensya sa imbestigasyon.
Aron masigur ang pagkapatas sa proseso, gipasiugda ni Ridon nga ang kredibilidad sa matag testigong isalang mo-agi sa hugot nga pagsusi. Ang tanang gilaomang mohatag og mga pamahayag ipa-ialwom sa pagpanumpa aron masiguro nga ang ilang mga testimonya nakabase lamang sa kamatuoran ug gisuportahan sa mga lig-on nga ebidensya.
