BUTUAN CITY– Hugot nga gisalikway sa Malacañang Press Corps (MPC) ang alegasyon nga sila gigamit o gibayran aron tabunan ang tinuod nga kahimtang sa kahimsog sa Presidente. Sa ilang opisyal nga pamahayag, giinsistir sa MPC nga nasayud sila sa kamahinungdanon sa kahimsog sa Presidente isip kabahin sa nasudnong seguridad.
Sumala sa MPC, ang ilang nangaging mga report ug mga press briefing nagpakita kon giunsa nila pag-ayo pagpangutana ang mga opisyal sa gobyerno bahin niini nga isyu. Gipaningkamotan usab sa MPC nga ipakita ang kredibilidad sa ilang mga taho sa miaging mga semana ug ilang gikondena ang mga paningkamot nga dauton ang reputasyon sa mga mamamahayag ug ilihis ang publiko alang sa personal nga interes sa uban.
Gidugang pa nila nga ang ilang mga balita nakabase sa beripikadong impormasyon gikan sa kasaligan nga mga tinubdan ug sa ilang kaugalingong nasaksihan, ug gisiguro nga matag detalye moagi sa masusi nga beripikasyon sa dili pa ipagawas sa publiko. Sa laing bahin, ilang gipanghimakak ang pipila ka content creators nga nagpakaylap og impormasyon nga walay igong basihanan ug nagsalig lamang sa social media, imahinasyon, ug kwestyonableng agenda.
Giawhag sa MPC nga ang publiko magpabilin nga mapanukiduki sa mga impormasyon nga makita online, ilabi na taliwala sa pagdagsa sa mga alegasyon ug bakak nga balita. Bisan pa sa mga kritisismo, gisiguro sa MPC nga magpadayon sila sa ilang katungdanan—mangutana, mag-obserba, ug mag-balita sa patas nga paagi alang sa kaayohan sa katawhan. Gipunting pa nila nga magpabilin silang panig sa kamatuoran ug interes sa nasud, bisan unsa pa ang mga hagit ug bisan kinsa pa ang molingkod sa Malacañang.
