BUTUAN CITY- Nahagsa ang usa ka Cessna 182 Skylane nga adunay tail number RP-C2444 sa usa ka so-ok nga parte sa Brgy. Navarro, Tubajon, Dinagat Islands kaganiha Miyerkules, Abril 8, 2026.
Gikataho nga nawala ang maong eroplano kaganiha sa hapon adiser kini nakit-an nga nahagsa sa nasangpit nga lugar. Adunay mga residente usab matud pa ang nakadungog sa kusog nga pagbuto banda ala 1 sa hapon, adiser nadiskobrehan ang eroplano.
Samtang Gikompirma usab sa Provincial Government sa Dinagat Islands, uban sa koordinasyon sa lokal ug nasyonal nga mga ahensya, nga nagpadayon karon ang Special Search and Rescue (SAR) Operation, samtang dili pa sigurado ang kahimtang sa piloto ug uban pang sakay sa eroplano.
Ang nagpadayon nga SAR operation gipangulohan sa Municipal Disaster Risk Reduction and Management Office (MDRRMO) sa Tubajon, uban sa tabang sa mga nasyonal nga ahensya sama sa Philippine National Police (PNP), Bureau of Fire Protection (BFP), ug Philippine Coast Guard (PCG).
Aron mas mapalig-on ang kapasidad sa operasyon, ang Provincial Government sa Dinagat Islands, pinaagi sa direktiba ni Governor Nilo Demerey, Jr., nagpadala og Incident Management Team (IMT) uban sa mga drone technical personnel aron motabang sa aerial assessment, mapping, ug pagpangita sa apektadong lugar.
Gipasalig usab sa mga otoridad sa publiko nga himuon ang tanang angay nga lakang aron masiguro ang hapsay ug koordinadong responde. Sa kasamtangan nagpabilin ang pokus sa pagpangita, retrieval, ug pagsiguro sa kaluwasan sa mga responder ug sa mga komunidad nga duol sa lugar. Giawhag usab ang publiko nga magpabiling kalmado, likayan ang apektadong lugar, ug ipahibalo dayon sa lokal nga mga otoridad ang bisan unsang adunay kalabutan sa insidente.
