BUTUAN CITY- Gisudo karun sa Senado ang usa ka sugyot baladonon nga magtugot sa panggamhanan nga kontrolon ang industriya sa lana ug magpatuman og price control aron protektahan ang mga konsyumer gikan sa nagpadayon nga krisis sa enerhiya.
Pormal na nga gipasaka ni Senator Loren Legarda ang Senate Bill (SB) No. 2020 nga gitawag og Bayanihan 3: Power to the People Act.
Tumong sa sugyot nga himuong institusyonal ang tubag sa nasud sa krisis pinaagi sa paghatag og awtoridad sa Department of Energy (DOE) ug Department of Finance (DOF) sa pangamhanan ang suplay ug presyo sa petrolyo.
Lakip sa nag-unang lakang ubos sa sugyot ang pagpatuman og temporary price controls, rasyonalisasyon sa distribution margins ug mandatory re-location sa suplay sa enerhiya.
Tugotan usab sa maong proposal ang emergency procurement alang sa paspas nga pagpalit og produktong petrolyo, renewable energy systems, ug uban pang pasilidad aron masiguro ang energy security.
Gawas sa regulasyon sa lana, maghatag usab og SB No. 2020 sa social aid sama sa fuel subsidies alang sa sektor sa transportasyon ug agrikultura, loan payment reliefs, ug tabang sa mga Overseas Filipino Workers nga mo-uli tungod sa krisis sa Middle East.
Sumalani Legarda, tumong sa batas nga taplan ang kakulangon sa Executive Order No. 110 ni President Ferdinand Marcos Jr.
Bisan paman nga nagdeklara kini og national energy emergency, gitumbok sa senadora nga kuwang ang kasamtangang polisiya sa direktang proteksyon alang sa mga consumers ug walay klaro nga timeline alang sa dali-ang aksyon sa gobyerno.
