BUTUAN CITY – Naka-full force na ang Bureau of Immigration (BI) samtang midagsa ang mga biyahero alang sa 2026 Semana Santa, diin liboang mga pasahero ang mobiyahe pauli sa ilang mga probinsya o magbakasyon.
Sumala sa BI, gibanabana nga moabot sa 45,000 ka international departing passengers ang moagi matag adlaw sa mga nag-unang paluparan sa nasod panahon sa Holy Week exodus.
Sigon ni BI Commissioner Joel Anthony Viado nga nagdugang na ang ahensya og mga frontline personnel ug support units aron masiguro ang hapsay ug paspas nga proseso sa mga tugpahanan.
Gipahimangnoan usab sa BI ang mga pasahero nga moabot sa airport dili moubos sa tulo ka oras sa dili pa ang ilang flight aron malikayan ang kalangay o kahasol.
Dugang pa sa opisyal, gipahinumduman pag-usab sa ahensya ang publiko nga libre ra ang pagparehistro sa eTravel platform.
Gihatagan usab nila og gibug-aton nga ang mga website nga maningil ug magpakaaron-ingnon nga opisyal nga eTravel site sa gobyerno kay mga scam o fraud site.
