BUTUAN CITY – Nagpasabot ang lead vocalist sa bandang Wolfgang nga si Basti Artadi, bahin sa viral video nga makita nga iyang gipagawas sa entablado ang usa ka audience member sa ilang reunion concert sa Davao City ning mi-aging semana.
Sa iyang video message nga gi-upload, gibutyag ni Basti nga nahitabo ang insidente samtang siya naghatag og tribute sa ilang namatay’ng bassist nga si Mon Legaspi niadtong 2022 kondiin dinhi na misinggit og bastos nga pulong usa ka lalaki batuk kang Pangulong Bongbong Marcos.
Human sa sunod-sunod nga samok, namahayag si Basti nga kung gusto nila ipadayag ang ilang freedom of speech, mahimo nila kini buhaton sa gawas, tungod kay sa sulod, para kini sa rock n’ roll ug sa paghinumdom kang Mon Legaspi ug dinhi na gimando ni Basti sa security nga ipagawas ang maong audience member.
Human sa insidente, misunod ang kusog nga hugyaw sa crowd ug gipadayon sa banda ang ilang pagkanta. Pagkasunod adlaw, gipasabot ni Artadi nga dapat maghinigugmaay ang tanan ug dili magpadala sa kahugaw sa pulitika.
