BUTUAN CITY- Gimando ni President Ferdinand Marcos Jr. sa Department of Foreign Affairs (DFA) nga makig-alayon sa Iran aron masiguro ang luwas nga pag-agi sa mga barkong adunay dala nga suplay padulong sa Pilipinas.
Sumala ni Palace Press Officer Undersecretary Claire Castro nga gimandoan na sa Presidente si DFA Secretary Theresa Lazaro nga makigpulong sa ambassador sa Iran.
Gilaomang matigayon ang importanteng panaghisgot karung simanaha o sa sunod simana.
Sigon ni Castro, ang nasangpit nga lakang tubag sa panawagan ni Senator Sherwin Gatchalian nga mohimo og high-level discussions ang ehekutibo aron masiguro ang ‘safe passage’ sa mga sakyanang pangdagat sa Strait of Hormuz taliwala sa tesnyon sa Middle East. Ang Strait of Hormuz usa ka kritikal nga agianan sa mga tanker sa lana ug uban pang kargamento.
Tumong sa deriktiba sa Presidente nga malikayan ang bisan unsang aberya sa dagan sa suplay sa enerhiya ug palaliton sa nasud samtang nagpadayon ang panagbangi sa nasangpit nga rehiyon.
Gipasalig sa Palasyo nga maayo ang relasyon tali sa Pilipinas ug Iran.
