BUTUAN CITY – Nagpaabot ug tambag si Engr. Junelito Abrazado, Regional Manager sa Civil Aviation Authority of the Philippines kon CAAP CARAGA sa mga mobiyahe karung holiday season.
Sumala pa sa opisyal nga lauman ang pagsaka sa ihap sa mobiyahe karung semana santa diin didto sa Siargao, nabati na kini ilabina kay ang maong isla giila man ang tourist destination samtang dinhe sa Butuan Airport, lauman usab sa musunod nga mga adlaw.
Tungod niini, gitambagan ni Engr. Abrazado ang mga mobiyahe nga pahimuslan ang online check-in sa mga airlines aron sa ingon duna nakay boarding pass og dili naka malangay sa paglinya aron mukuha niini.
Samtang sayron gayud kung wala ba makabitbit og mga gibawal nga butang sama sa hinanggiban o mga gamit nga hait sama sa screw driver. Bisan ang mga liquid aerosol o perfume, cologne o shampoo nga lapas sa 120 mil samtang e-andam na ang valid ID.
Mas maayo usab nga mosayu aron dili ma-abtan sa final call o masirad-an na sa check-in.
Hinoon gibutyag ni Engr. Junelito Abrazado nga dunay igong seguridad ang airport nga kada adlaw gyud ipa-implementar.
Sumala sa opisyal nga composite team ang mohatag og segurdad sa Butuan Airport sama sa Aviation Security Personnel, Butuan City Police Office, Office of Transportation Security, Special Security Unit og K-9. Samtang dunay mo-manage usab nga mga personahe niini dinha sa entrance samtang dunay fast lane alang sa senior citizen og mabdos.
