BUTUAN CITY – Gipahayag sa Department of Energy (DOE) nga nakatipid ang nasud og hapit 145.43 megawatts nga enerhiya tungod sa pakighiusa sa Earth Hour nga gihimo gikan alas 8:30 sa gabii hangtod alas 9:30 niadtong Sabado, Marso 28.
Sa usa ka pahayag, sigon sa ahensiya nga base sa ilang datos, nakatipid og mga 75.25 MW nga enerhiya ang dako nga bahin sa Luzon, 66.6 MW sa Visayas, ug 3.58 MW usab sa Mindanao.
Sumala ni Energy Secretary Sharon Garin, ang pakighiusa sa mga Pilipino sa tinuig nga Earth Hour nagpakita nga kaya sa nasud makab-ot ang mahinungdanong pagkunhod sa konsumo sa enerhiya.
Kini usa ka pahinumdom nga ang pagtipid sa enerhiya dili lang ipatuman sulod sa usa ka oras, kundili dapat atong puy-an kini sa matag-adlaw.
Samtang gi-awhag sa Energy Department ang publiko nga ipadayon ang espiritu sa Earth Hour dili lang isip usa ka tinuig nga selebrasyon, kundili pinaagi sa pagpraktis sa energy-efficient nga mga binuhatan bisan sa balay ug sa trabaho.
