BUTUAN CITY – Nanguna ang Pilipinas sa listahan sa mga nasud nga nakasinati sa pinakadako nga pagsaka sa presyo sa lana sukad nagsugod ang tensyon sa Iran niadtong Pebrero 23, 2026.
Base sa datos sa Global Petrol Prices, misaka og 81.6% ang presyo sa diesel sa nasud karong Marso, nga mao ang labing taas sa tibuok kalibutan.
Sunod niini ang Nigeria nga adunay 78.3% ug Malaysia nga 57.9% nga pagsaka.
Samtang, gamay ra ang pagsaka sa presyo sa mga nasud sama sa Japan (14.0%) ug South Korea (15.1%), samtang nagpabilin nga wala’y kausaban ang presyo sa India ug Saudi Arabia.
Nagpakita ang datos nga mas grabe ang epekto sa global nga krisis sa merkado sa lana sa mga nasud sa Asya, labi na sa Pilipinas nga nagsalig sa imported nga suplay.
Dugang pa n niini ang padayon nga pag-ubos sa piso nga mikunhod ngadto sa P60.23 kada dolyar nagpasamot sa kabug-at sa presyo sa petrolyo, nga mas mabati na karon sa mga konsumidor ug negosyo sa ilang adlaw-adlaw nga operasyon.
Kini nga sitwasyon nagpamatuod sa grabeng hagit nga giatubang sa nasud taliwala sa global nga kagubot, nga nagdala og mas dakong palas-onon sa ekonomiya ug panginabuhi sa mga Pilipino.
