BUTUAN CITY – Nagpabiling lig-on ang buffer stock sa bugas sa Pilipinas, bisan paman sa epekto sa giyera sa Middle East sa pangkalibutanong negosyo.
Sigon ni National Food Authority (NFA) Administrator Larry Lacson, bisan og siguradong maapektuhan ang bugas, ilabina sa mga nasud nga miangkat sama sa Pilipinas, lig-on ang inventory sa bugas sa nasud aron tubagon ang demand o konsumo.
Gipananglitan niini ang stock nga gihawiran sa NFA diin muabot pa sa 2.6 million sako sa milled rice.
Hangtud 600-mil ka bags niini ang gigahin para sa mga modaug sa auction, samtang duha ka milyong sako usab ang nakagahin para sa publiko ug sa panginahanglan sa gobyerno.
Kung sumahon ang katibuk-an sa buffer stock kauban ang mga palay nga wala pa nagaling, muabot sa walo ka milyong sako sa bugas ang gihawiran sa ahensiya sa kasamtangan.
Kini bugti sa 10.3 ka adlaw nga supply para sa tibook Pilipinas.
