BUTUAN CITY- Nag-andam ang gobyerno sa Pilipinas sa pag-repatriate sa labing menos 480 ka Pilipino gikan sa Middle East tungod sa nagkataas nga tensyon tali sa Iran, Estados Unidos ug Israel, sumala sa pamahayag sa Philippine Consulate sa Dubai.
Sigon ni Consul General Ambrosio Brian Enciso III nga ang mga repatriate naglangkob og mga turista ug migrant workers nga mo-uli sa Pilipinas sakay sa usa ka-chartered flight nga gibayran sa gobyerno, lakip na ang transportasyon gikan Dubai padulong Fujairah.
Matod niini, 136 ka mga Pilipino gikan sa konsulado, kapin 270 gikan sa Migrant Workers Office, ug 90 gikan sa Abu Dhabi ang gipaabot nga mosakay sa maong biyahe uban ni Migrant Workers Secretary Hans Cacdac.
Ang maong lakang gihimo tungod mingsamot ang tensyon sa rehiyon human sa joint military operations sa Estados Unidos ug Israel batok sa Iran niadtong Pebrero 28.
Gibutyag usab ni Enciso nga posible pang mag-arrange og dugang chartered flights depende sa panginahanglan sa mga Pilipino nga gusto mo-uli sa nasod, samtang nagpadayon ang gobyerno sa pagtabang sa mga OFW nga apektado sa krisis sa Middle East.
