BUTUAN CITY- Gisugdan na sa City Government of Butuan ang komprehensibong plano alang sa pag-modernize sa Langihan Public Market, human sa serye sa public consultation sukad pa niadtong tuig 2024.
Kini mao ang mga rehabilitation sa public restroom, construction sa modular relocatable building alang sa Fish Landing, ug rehabilitation sa Taboan Flea Market Public Restroom. Ang tumong matud pa niini mao aron nga mahatagan og mas limpyo, hapsay, ug komportableng merkado alang sa tanan nga magpapatigayon ug mamalitay.
Aron masuportahan ang mga proyekto sa modernisasyon, ipatuman karong tuiga ang bag-ong rental program nga gi-uyonan usab sa tanang stallholders atol sa gihimong panagtapok.
Sa maong mga konsultasyon, gipangayo ug gihatagan og bili ang mga sugyot sa mga stallholders, hilabina sa bahin sa staggered nga rental adjustment nga bahinon sa tulo ka tuig aron dili bug-at sa ilang panginabuhi.
Sumala sa City Economic Enterprise and Development Department, ang maong programa usa ka lakang aron mapadayon ang modernisasyon ug kalamboan sa merkado samtang ginasiguro nga patas ug masaligan nga proseso alang sa mga negosyante.
