BUTUAN CITY- Dakong ka-hasul ang nasinati sa mga residente sa Purok 5, Barangay Mahogany, Butuan City tungod sa padayon nga paglabay sa basura gikan sa kasikbit nga mga barangay sama sa Port Poyohon ug Holy Redeemer nga nagtapok sa ilang lugar matag kadlawon.
Sumala ni Cherrly Goloran, Purok 5 President, nga dugay na nilang gipatuman ang husto nga segregation ug adunay klarong schedule sa pagpahuha sa basura nga ginabantayan sa committee on environment, apan ang problema mao ang pag-abot sa mga sinakong basura nga dili segregated ug mixed nga gikan sa laing barangay.
Gipunting niini, nga ang mga residente sa Purok 5 disiplinado ug edukado sa hustong pagdumala sa basura, apan dili na nila makaya ang pagbadlong sa padayon nga paglabay sa dili matarong nga basura nga ginabuhat sa ngitngit nga oras.
Sigon pa ni Goloron, nga bisan pa sa paningkamot sa barangay council nga malikayan ang maong pamatasan, nagpabilin gihapon ang problema nga naghatag ug dakong hagit sa komunidad.
Dugang pa sa Purok President, nga sila ang naggrabihan tungod sa padayon nga paglabay sa sinakong basura nga sagol ang malata ug dili malata, lakip na ang mga mixed clothes, nga gibilin sa garbage truck tungod kay dili kini husto nga na-segregate.
Gibutyag usab niini, nga sila na mismo ang napugos nga mo-segregate ug molubong sa mga basura nga gibilin, kasna naghatag ug dakong kahasul sa komunidad.
Gani atol sa ilang clean-up drive kagahapon, personal nga nakita sa Kapitan sa maong Barangay ang mga basura nga gikan sa Barangay Mahay, Dato Silongad, Port Poyohon ug kasagaran sa Baan Riverside diin naglabay sa basura pinaagi sa mga tricycle collector nga gisuholan ug wala na hisayri pa kung asa kini gipangdump.
Gipasiugda usab ni Goloran, nga gi-aksyonan na kini sa barangay council, apan nagpabilin nga dakong hagit ang pagdagsa sa basura nga gikan pa sa ubang lugar sa syudad ug gipanglabay sa Barangay Mahogany
