BUTUAN CITY- Naabtan nga wala nay kinabuhi ang usa ka pasahero human ma-unlod ang usa ka motorbanca sa kadagatang bahin duol sa Brgy. Day-asan, Surigao City, alas 7:00 sa buntag, Dominggo, Enero 18, 2026.
Sumala sa City Disaster Risk Reduction and Management Office, alas 8:06 sa buntag opisyal nga nareport ang insidente sa mga otoridad. Ang maong motorbanca nga ubos sa 3 gross tons ug gisakyan sa grupo nga gipangulohan ni Mario Larong, nilarga gikan sa Brgy. Talisay padulong sa mainland sa siyudad apan nakasugat matud pa kini og dagkong balod nga maoy hinungdan sa pagka-unlod.
Gilayon nga mingresponde ang Philippine Coast Guard kauban ang Special Operations Group ug FPB-151 aron magsugod og search and rescue operation.
Samtang nagpadayon ang operasyon, usa sa mga survivor nga si Jun Montederama mipahibalo nga ang kadaghanan sa pasahero naluwas pinaagi sa tabang sa laing motorbanca, apan usa ka indibidwal ang wala pa makit-i.
Alas 9:20 sa buntag, gipahibalo ni Vincent Angelo Ramiro nga ang missing nga pasahero nakit-an nga patay ug gideklarar nga Dead on Arrival sa Surigao Medical Center.
Ang biktima nailhan nga si Nelyn Longos, 47 anyos, residente sa Buenavista, Agusan del Norte.
Sa kinatibuk-an, 11 ang naluwas samtang usa ang namatay.
Ang naunlod nga motorbanca gibira padulong sa Brgy. Talisay alang sa safekeeping ug posibleng pag-ayo.
Gipahimangnoan usab sa mga otoridad ang publiko nga likayan ang pagbiyahe sa dagat kon dili maayo ang panahon aron malikayan ang susamang trahedya.
