BUTUAN CITY– Human sa pipila ka adlaw nga padayong search, rescue, ug retrieval operations, usa na lamang ka tawo ang wala pa makit-i, samtang misaka na sa 35 ang nakumpirmang patay sa makalilisang nga landslide nga miigo sa dumpsite sa Barangay Binaliw, Cebu City niadtong Enero 8, 2026, sumala sa pinakabag-ong report sa mga otoridad.
Sa alas 2:20 sa hapon, gikumpirma nga 18 ka indibidwal ang nasamdan ug gilayon nga gidala sa nagkadaiyang ospital alang sa hustong medikal nga pag-atiman.
Padayon gihapon ang deployment sa 36 ka personnel sa Bureau of Fire Protection (BFP) sa lugar, bisan pa sa delikadong kahimtangan sa dumpsite, aron ipadayun ang operasyon sa pagpangita ug pagkuha sa mga biktima.
Sumala sa mga responder, lisod ug peligroso kaayo ang operasyon tungod sa dagkong bunton sa basura ug yuta nga nagtabon sa mga biktima, hinungdan nga hinay ug maampingon ang matag lihok. Bisan pa niini, nagpadayon gihapon ang operasyon bisan aduna pay hulga sa posibleng dugang nga pagkahugno sa yuta.
Gani, nagtinabangay ang lokal nga kagamhanan ug nagkadaiyang disaster response agencies aron matabangan ang mga biktima ug ilang mga pamilya, lakip na ang paghatag og kahupayan ug suporta.
Sa pagkakaron, wala pa gipagawas ang mga identidad sa mga namatay samtang gihulat ang pormal nga pagpahibalo sa ilang mga kabanay.
Padayon pa ang search, rescue, ug retrieval operations samtang gisusi sa mga otoridad ang tinuod nga hinungdan sa trahedya nga nakapabalaka sa komunidad sa Barangay Binaliw, Cebu City.
