BUTUAN CITY- Pabor matud pa ngadto sa mga motorosta ang ipatuman sa Land Transportation Office kon LTO nga dili na mangompiska og driver’s license sa higayon nga adunay madakpan nga violation, ug imbes kuhaon kini, ticket na lang ang ihatag isip silot.
Kini nga lakang gitan-aw nga pabor sa daghang motorista, ilabi na sa mga tricycle driver ug uban pang mga drayber sa land transport.
Sumala ni Ritchie Ravelo, Presidente sa Federation of Eastern Suburb Four-Seater Toda, dakong kaayohan kini alang sa mga drayber tungod kay dili na sila mahasol sa pagkawala sa lisensya nga usa ka importante nga dokumento ug gigamit sa kadalanan isip legal nga pamatuod sa ilang pagmaniho. Apan gibutyag usab ni Ravelo nga adunay negatibong epekto ang maong sugyot.
Sa iyang pagtan-aw, kung dili na kompiskahon ug dili i-suspende ang lisensya, posible nga daghan ang mag-abusar sa balaod sa trapiko, sama sa makita sa social media nga adunay mga drayber nga nagsalig nga ticket ra ang silot.
Kini makahatag og kahigayunan sa uban nga magpadayon sa paglapas sa balaod tungod kay wala silay kahadlok nga kuhaon ang lisensya.
Gipasiugda ni Ravelo nga ang polisiya adunay positibo ug negatibo nga epekto kung asa makahatag og kaluwasan ug kahupayan sa mga drayber nga matinud-anon, apan makapaluag usab sa disiplina sa kadalanan kung dili kini tarong nga ipatuman.
