Gipirmahan na sa Pilipinas ug United Arab Emirates kon UAE ang makasaysayanong Comprehensive Economic Partnership Agreement kon CEPA tali sa Pilipinas ug United Arab Emirates karung adlawa Martes sa Abu Dhabi.
Gisaksihan ni President Ferdinand Marcos Jr ug UAE President Sheikh Mohamed bin Zayed Al Nahyan, ang pagpirma sa Comprehensive Economic Partnership Agreement.
Sa bahin sa Pilipinas si Trade and Industry Secretary Ma. Christina Roque ang mingperma sa kasabutan nga gipahigayon sa sidelines sa Abu Dhabi Sustainability Week 2026.
Tumong niini nga pa-ubsan ang taripa, palapdan ang market access sa mga produkto ug serbisyo, pakusgan ang pamuhunan, ug pagmugna og dugang mga oportunidad alang sa mga Pilipino sa UAE.
Lakip sa mga sektor nga sakop sa maong kasabotan mao ang digital trade, MSMEs, sustainable development, ug professional services. Gilaomang makapahimulos ang mga produktong Pilipino sama sa saging, pinya, de-latang tuna, ug electronics.
Niadtong 2024, ming-abot sa dul-an US$1.83 bilyon ang pamatigayon tali sa duha ka nasud.
Gilaomang makapasaka og kapin 9% ang CEPA sa export sa Pilipinas sa UAE ug makapalig-on sa relasyong pamatigayon sa Gulf region.
Mingtambong usab sa pagperma si First Lady Liza Araneta Marcos.
