BUTUAN CITY – Nanghunaw si Prosecutor General Richard Anthony Fadullon kalabot sa nahimutangan karon ni Technical Sft Orly Guteza, tungod sa kalit nga pagkawala niini human una ug katapusang mitestigo sa Senate Blue Ribbon Committee batuk sa mga tawong nalambigit sa lapad nga kurapsyon karon sa gobyerno gamit ang mga anumnalusong flood control projects.
Sa pagpangutana ni Committee Vice Chairman Erwin Tulfo kung buhi pa ba o kaha patay na si Guteza, gipadayag ni Fadullon nga wala’y inter-action kaniya ang Department of Justice ilabina human sa pagtestigo niini sa komite nga gikakurat sa tibuok Pilipinas.
Kini tungod sa wala’y lipod-lipod niyang pagpadayag nga sila kanhi Ako Bicol partylist Rep Zaldy Co ug si kanhi House Speaker Martin Romualdez maoy nagpaluyo sa garapalang kurapsyon sa pundo sa katawhan.
Apan sigon ni Fadullon, wala mupatim-aw kanila si Guteza alang sa posibleng pagpa-ilawom niini sa Witness Protection Program.
Wala matago ni Senador Erwin Gatchalian ang iyang kabalaka kung unsa na ang nadangatan karon ni Guteza, tungod sa kadako sa iyang rebelasyon nga posibleng mahulog na lang unya sa wala.
Giklaro usab ni committee chairman Ping Lacson nga ilang gi-imbitar si Guteza aron mutambong sa pagdungog niining adlawa, base na sa katapusang address diin kini nasutang nagpuyo, apan wala’y bisan usa sa iyang mga ka-ubanan sa balay, ang nasayod sa iyang nahimutangan.
Dinhi na usab sila nagpatabang kang Senador Rodante Marcoleta aron makatunga si Guteza, apan wala usab kini nahatag kanila nga ideya.
