BUTUAN CITY – Tulo ka menor de edad ang namatay samtang laing upat ang angol human nalubong ang ilang mga balay sa pag-igo sa Super Typhoon Uwan sa Nueva Vizcaya.
Sumala ni Alvin Ayson, tigpamaba sa Office of Civil Defense (OCD) Region 2, apil sa mga namatay ang lima ka tuig nga kaluha, samtang tulo ang nasamdan human malubong ang ilang balay sa Sitio Poblacion, Barangay Balangabang, lungsod sa Kayapa, tungod sa pagdahili sa yuta.
Sigon sa Kayapa Police Station, nahitabo ang landslide pasado alas-2:30 sa kaadlawon samtang natulog ang mga biktima uban sa ilang ginikanan ug usa pa ka igsoon.
Daling giluwas sa aamahan uban sa tabang sa mga silingan, ang kaluha ug gidala sila sa duol nga ospital, apan gideklara silang dead-on-arrival samtang padayon pang nagpa-ayo sa ospital ang ilang ginikanan ug usa ka igsoon.
Sa laing insidente, usa ka 10-anyos nga Grade 5 pupil ang namatay ug usa ka 12-anyos nga Grade 6 usab ang nasamdan human maigo sa lain pang landslide sa Kasibu, Nueva Vizcaya.
