BUTUAN CITY – Gimando karon ni Pangulong Fedinand ‘Bongbong’ Marcos Jr ang pagsuspende una sa tanang mga State of the Nation Address kon SONA-related preparations, human nakita ang dakong epektong hatud sa pagkuso-kuso sa bagyong Crising didto sa Luzon ingon man sa hanging habagat sa Visayas og Mindanao.
Sa gipagawas nga statement gikan sa buhatan ni Executive Secretary Lucas Bersamin, nasuta nga dismayado matud pa ang pangulo sa nanggawas nga mga reports kalabot sa mga government personnel nga nagmontar og mga materyales sa mga pampublikong lugar samtang nakasinati og grabeng pagbaha ang mga komunidad.
Gimanduan niini ang Department of Public Works and Highways kon DPWH ug ang tanang concerned government agencies nga tutukan ang flood response ug relief efforts, tungod kay kinahanglang hatagan og prayuridad ang kaluwasan ug kaayuhan sa katawhang Filipino panahon sa kalamidad.
