BUTUAN CITY – Nagpa-ulan karon sa dakong bahin sa Pilipinas ang duha ka low pressure areas nga ania sa sulod sa Philippine Area of Responsibility kon PAR apil na ang hanging habagat.
Ang usa ka LPA nasigpatan sa gilay-ong 1,140-kilometros sa sidlakang bahin sa Central Luzon samtang ang usa, nasigpatan sa gilay-ong 370-kilometros sa sidlakang bahin sa lungsod sa Calayan, Cagayan.
Tungod niini, makasinati og kusog nga pag-ulan ang Metro Manila, CALABARZON (Cavite, Laguna, Batangas, Rizal ug Quezon), Zambales, Bataan, Pampanga, Bulacan, ug Occidental Mindoro nga posibleng magdala og mga pagbaha o kaha landslides nga dala sa habagat apil na ang Pangasinan, Benguet, Tarlac, Marinduque, ug Oriental Mindoro.
Samtang ang Visayas, ubang parte sa Luzon, Zamboanga Peninsula, BARMM, SOCCSKSARGEN, ug Davao Region, makasinati og mapanganurong kalangitan uban sa katag-katag nga pag-ulan, panalogdog ug pagpangilat tungod sa hanging habagat nga posibleng maghatud og flash floods o kaha landslides.
Ang ubang bahin sa Mindanao, makasinati og panagsa ngadto sa mapanganurong kalangitan uban sa pat-ak pat-ak nga pag-ulan, panalogdog ug pagpangilat nga posibleng musangpot ngadto sa kalit nga pagbaha ug pagdahili sa yuta higayong mukusog ang pagbundak sa ulan.
