BUTUAN CITY – Gidugok sa libuang mga deboto ang Sitio Iyao, Brgy. Anticala ning dakbayan sa Butuan sugod kaganinang ala-una pa lang sa kaadlawon alang sa tinuig nga Panaad 2025.
Nasayrang dili lamang mga hamtung ang ningpuno sa kadalanan ingon man sa mga estasyon sa krus kundili lakip na usab ang mga magtutuong batan-onan.
Sa pagpanubay sa Bombo Radyo Butuan, nasuta nga daghan usab ang mga gipanghanyag nga libre sa Panaad site sama sa mga kape, puto, ingon man mga libreng itlog.
Ang Panaad, na-andan na sa mga debotong Katoliko matag-Biernes Santo nga motungas sa nasangpit nga bukid diin nahimutang ang mga estasyon sa krus isip penitinsya.
Sigon usab sa usa ka deboto nga si Joel Ramira nga nilambigit sa maong Panaad, gihimo matud pa niya kini matag tuig isip Kristiyano, alang na usab sa pakig-ambit sa bisan gamay lang nga porsiento sa kasakit nga giantus ni Huse Kristo sa dalan padulong sa lugar diin kini gilansang sa krus.
Dugang ni Ramera, iyang namatikdang mas hapsay na ang kasamtangan nga Panaad ilabina nga matag tuig kining ginahimo ug gi-organisa sa lokal nga kagamhanan, rason nga daghan nang mga kabag-ohan ang gi-adaptar alang sa pag-improve pa sa maong kalihukan.
