BUTUAN CITY – Gidagsa sa bagang doot sa katawhan ang gihimong candle lighting sa may Guingona Park ning siyudad sa Butuan kagabii apil na sa ubang mga lugar sa Caraga Region isip suporta kang kanhi Pangulong Rodrigo Duterte kinsa gipadakop ug taralon na sa International Criminal Court sa The Hague, Netherlands.
Bisan paman sa panawagan sa mga lideres sa grupo nga nagsuporta sa mga Duterte sama sa Sara All Movement nga dili mohimo og dakong panagtapok, wala napug-ngan sa katawhan dili lang gikan sa Butuan City kundi lakip na sa kasikbit nga lalawigan sa Agusan Del Sur ug Agusan Del Norte apil na sa Surigao area, ang magtapok isip pagpakita sa ilang suporta.
Singgit nila ang pulong nga Duterte samtang makita usab sa mga placards ang pagpa-resign kang Pangulong Ferdinand ‘Bongbong’ Marcos Jr.
Gawas sa gihimong candle lighting nga nagsugod sa alas 5:00 sa hapon ug milungtad sa lawom nga kagabhi-on, dunay tag-as nga motorkada usab ang gihimo nga gi-apilan sa daghang mga grupo sa mga riders og uban pa.
Nasayrang walay pormal nga organizer sa maong kalihukan tungod kay gi-post lang kini sa social media human sa pagka-aresto ni Digong. Tungod sa dakong panagtapok, makita usab ang presensiya sa kapulisan ug sa mga sakop sa City Transportation and Traffic Management Department kon CTTMD ning dakbayan.
