BUTUAN CITY – Nailhan na ang duha ka indibidwal nga napatay human ang engkuwentro tali sa kasundaluhang sakop sa 29th Infantry Battalion, Philippine Army og rebelding New People’s Army kon NPA pasado alas 9:45 sa miaging buntag sa bukirang parte sa Sitio Dinakpan,Barangay Los Angeles, Butuan City.
Giila ni Police Lt. Crispulo Alburo, tigpamaba sa Butuan City Police Office ang napatay nga sila Ruel Dumaguin, 53-anyos, usa ka mag-uuma nga taga Sitio Iyao, Barangay Anticala ning siyudad og si Benedicto Avelino, mag-uuma nga residente sa Barangay LOs Angeles.
Gitoohang miyembro sa Platoon 1, Sub-Regional Sentro De Grabedad Westland ilawom sa Northeastern Mindanao Regional Committee ang mga niini nga napatay human sa 10 ka minuto nga engkuwentro.
Samtang nakuha usab sa lugar nga nahitaboan ang duha ka tag-as nga kalibre sa armas nga gilangkuban sa usa ka AK-47 rifle og Bushmaster rifle kauban ang duha magazines, mga bala, nagkadaiyang suplay pang-medical og uban pang personal nga gamit.
Base sa pamahayag usab ni Brigadier General Arsenio Sadural, Commander sa 901st Brigade, Philippine Army nga maong grupo ang kasamtangang naghawid sa Regional Headquarters nga gipanguluhan ni Myrna Sularte, alias Maria Malaya, kansa kanunay nga makasibat sa mga combat operation sa kasundaluhan.
