BUTUAN CITY – Pito na ka mga tawo ang patay sa wildfires sa Los Angeles, California ug sigon sa mga weather forecasters, posibleng mulapad pa ang makaon nga lugar sa mga kalayo tungod padayon pa ang paghuyop sa kusog nga hangin.
Sigon sa mga otoridad, lima ka mga patay’ng lawas ang napalgan sa bisinidad sa Eaton fire samtang laing duha ang natala sa Palisades kaganina. Sigon ni Los Angeles County Sheriff Robert Luna, dili luwas nga abton ang ubang mga lugar nga nagrabihan sa sunog ug posible pang madugangan ang death toll.
Gilantaw na usab sa mga arson investigators ang pagsugod sa usa ka kalayo sa Palisades, nga mi-abot na sa kapin 5,300 ka mga istraktura samtang ang Eaton fire gibana-banang mi-abo usab og 4,000 ngadto sa 5,000 ka mga istraktura.
Giplanuhan karon ang pagpatuman og curfew sa pipila ka mga lugar human naka-aresto ang mga pulis og 20 ka mga tawong nangawat gikan sa mga abandonadong panimalay.
