BUTUAN CITY – Plano karon ni Vice President Sara Duterte nga mag-hire og private security isip hulip sa iyang kasamtangang detail, nga gikatakdang kuhaon sa Armed Forces of the Philippines (AFP).
Gibulgar kini ni VP Inday human siya nagpadala og sulat ngadto kang AFP chief of staff Gen. Romeo Brawner Jr. kondiin gisultihan niya ang heneral nga dili na hulipan ang maong mga security personnel nga kuhaon gikan sa iyang security detail.
Sa iyang gipatawag nga press conference, gipadayag ni VP Sara nga nag-explore na sila og mga private security services kondiin ang iyang bana nga si Atty. Manases “Mans” Reyes Carpio, maoy matud pa’y mu-abaga sa galastuhan sa pag-hire og private security.
Iya pang giklaro nga mga professional security services ang ilang i-tap aron masiguro nga dili kini ikonsidera sa gobyerno nga private army.
