BUTUAN CITY – Gikondena ni Senador JV Ejercito ang bag-ong pagbomba ug pagpangharass sa China Coast Guard sa BRP Datu Pagbuaya samtang mihimo og routine patrol dool sa Bajo de masinloc.
Gipamugos ni Ejercito nga hugot nga pagsupak sa international law ug sa soberenya sa Pilipinas ang bag-ong pagpang-bully sa China. Subli usab matud pang gibutang sa China Coast Guard sa kakuyaw ang atong mga tropa tungod sa pagpamomba sa water canon ug pagbalewala sa atong katungod sa West Philippine Sea.
Dugang pa sa senador, pamatood lang kini nga sakto ang iyang panawagan nga dili na dapat malangay pa ang AFP Modernization program . Dapat lang nga well-equipped ang kagamitan sa armadong kusog aron depensahan ang atong gipanag-iyahang kadagatan ug soberanya nga walay pagduha-duha.
Samtang sa pagsalang sa gamhanang Commission on Appointments sa 15 ka heneral ug flag officers sa AFP, gitumbok ni Senador Ramon Bong Revilla Jr. ang mga sakripisyo sa mga sundalong Pilipino ug giila niini ang ilang kontribusyon partikular sa pagproteka sa teritoryo sa Pilipinas.
